Hih Tuuno Labu application pen EBY Maryland leh EBY DC khangnote hanciamna tawh hong piangkhia application a hihi. Hih application zatna hang in Pasian minphatna ah a tangzai zaw in zattheih nading leh lasakna/ lamakaihna, lamal zon nopna, homecell leh musician te' la-aw zonnate ah a baih thei pen ding deihna tawh kibawl a hi hi. Hih application hong piangtheih nading in hong thukimpih i biak Pasian tung lungdam ko masa nuam ung.

Hih app sung aa hymn late zattheih nading in phalna ong pia EBC Gambup President Rev. Nang Lyan Kap leh Pasian minphatna dingin a late uh phaltakin hong koihsak la-atte (composers) tungah zong lungdamna hong ko ung. La hong letsakte leh la-aw (tune) hong phuahsakte tungah zong lungdamna hong ko phapha ing. Pasian in Ama minthanna dingin hong zatsak semsem ta hen.

Hih Tuuno Labu app in Pasian phatna ding aa kibawl ahih mah bangin, hih app zat nading in sum piak kullo a, mikim in a khawnkong (free of charge) in ki zang thei hi.

EBY Maryland

Hih Tuuno Labu app pen iOS platform aa dingin kibawl masa hi aa, February 4, 2022 in a masa pen ki launch masa hi. 2022 kum sung mahin lamal manlo etkikna tamveipi mah ki nei a, Gospel late leh Android platform a dingin zong bawlzawh nading ki lunggulh mahmah hi.

2023 kum ciangin EBY Maryland te hanciamna tawh Android platform aa ding leh Gospel la pawlkhat tawh version 2.1 hong launch kik zo ung. iOS version 15+ a zang iPhone leh iPad a hi zong, Android devices SDK 21+ tungsiah in baihtakin hih Tuuno Labu app ki download thei hi.

Android app pen app developer Phill Valoyi in a kisapna nungzui in lungduaitak leh a tawmbei theithei dingin hong bawlsak ahih man in, EBY Maryland min tawh zong lungdam hong ko ung.

La leh lamal tawh kisai dotnop tuamtuam a om leh Contact section sung aa om editors te kiang a hun zui-in ki dong thei hi. Application tawh kisai dotnop a om leh support@tuunolabu.com ah email tawh ki dong theih hi. Application tawh kisai puah tohtoh ding tampi om ding ahih manin, feedback pen lunggulh mahmah hi ung. Feedback pen App Store ah comment tawh zong ki pia thei hi.

Hih application pen bangmah copy omlo aa, kei zatnop dan platform leh framework tawh kizui aa ki bawl hi. A baihsa zattheih ding bangmah server source omlo a hih manin, haksatna tampi kiphulkha hita mah leh tuateng khempeuh hong gualzawh pih hong it den i Pasian tung lungdam ko loin om theilo hing.

A diakdiak in lamalte pen hard coding bawlkul masa aa, hih hard coding bawlna sung aa kihel EBY Maryland leh EBY DC khangnote ahi zong, editor hong sepsakte tungah kei aituam in lungdam hong ko ing. Mailam hun ah hih dan application a bawlnuam i om leh source code a baihsa in om aa, a hi zong nong theihsak masak ding uh lunggulh mahmah ing.

A tawpna dingin, hih app hong pian' theih nading in deihsakna tawh thu ong nget pih EBC Pawlpi mite leh hih app ka zawh dongin tha ong pia lawm leh gualte a hi zongin, ka innkuam pihte tungah zong lungdamna hong ko ing.

Hih app zatna hangin Pasian minthangna leh Ama gam zaina a hih zawk nading in i biak Pasian in ong zatsak ta hen.

Eite a tawntungin hong it den i Pasian in minthangna, vangliatna, leh ukzawhna khempeuh tang tawntung ta hen! Amen